NA ANTIGÜEDÁ

Esisten testimonios bien antiguos del poblamientu na zona (túmulos y dólmenes del Neolíticu en La Cobertoria, mines de cobre en L’Aramo), así como de la dómina romana y altomedieval (con munchos castros espardíos pel territoriu, los más d’ellos tovía ensin estudiar).

Nun tenemos noticia de cueves con pintures rupestres o otros rastros humanos, anque ye posible qu’esistan yacimientos similares a los de Teberga (abrigos de Fresnéu) y Santu Adrianu (Cueva del Fornu).

Sí conocemos topónimos rellacionaos con pueblos prerromanos, como L’Aramo (nome de divinidá gala) o’l mesmu nome de Quirós, referíu a una peña o suelu pedregosu, o a un antropónimu. Nes tierres limítrofes apaecen tamién restos de cultos xentiles (Bendueños en ¿¿ena, referíu al dios celta Vindonius). La toponimia menor presenta tamién palabres arcaiques:

• Alba: Alp- (sitiu blancu y altu)
• La Candanosa: Kant-, Kand- (peña de color blanco)
• La Ciga¿¿a: Sek- (agua, ríu que naz del monte)
• Las Navariegas: Nawa- (fondigonada, llanura ente montes)
• Saliencia: Sal (corriente d’agua)
• Nomes de sitios o finques averaos a Vi¿¿ar de Cinfuegos.

ROMANIZACIÓN Y DÓMINA VISIGODA

La güella romana apaez en nomes de llugar (Cuañana, nome rellacionáu con otros como Xomezana, Llaviana, Mamorana, Parana, etc.; Nimbra o nemus-oris,“viesca sagrada”) y n’El Camín Rial de la Mesa, otra vía romana a L’Altu Ventana, anque nun conste la esistencia d’asentamientos destacables, pese a la relativa proximidá a villes documentaes como la de Mamorana en conceyu de ¿¿ena.

Nun tenemos noticies de la dómina visigoda y la invasión musulmana, excepto polos restos afayaos en llugar de ¿¿indes, y el pasu d’una expedición mora de castigu per L’Altu Ventana y el valle de Ricao, según afirma Sánchez Albornoz.

OBISPÁU D’UVIÉU

De la dómina de la Monarquía Asturiana hasta’l sieglu XVIel territoriu pertenez al Obispáu d’Uviéu, por mor de les donaciones reales (Ordoño I nel 858 y Alfonso III nel 875). Representaba’l poder episcopal na zona la familia Bernaldo de Quirós, con solar en castielu d’Alba. El so palaciu principal yera El Palacio de Las Agüeras, mui cerca de la desaparecida torre de Valdemurio.

CONSTITUCIÓN DEL CONCEYU

En sieglu XVI el territoriu pasa de ser obispalía (esto ye, propiedá de la ilesia) a ser de realengu, dao que Felipe II-y lu merca al Papa Gregorio XIII. Pocos años depués, como recuerda Canella, los vecinos acuerden comprar la llibertá pagando a la Facienda real la suma, nada despreciable, de 12.000 morabetinos por cada ún de los 394 habitantes de Quirós.

El pagu efectúase ente los años 1581 y 1587, y el 6 de payares del 1587 el Monarca otorga la cédula de llibertá al conceyu, que constituye los sos propios órganos de xestión, nos que va siguir influyendo decisivamente la nobleza local.

Daquella, la sé del Conceyu yera un castiellu o torre, de la que nun deben quedar restos materiales, anque quiciabes perviva ente los vecinos dalgún recuerdu o tradición oral sobre él. Sí tenemos referencies de dos autores del sieglu XIX: Nel Diccionario Geográfico-Histórico de Martínez Marina, obra inconclusa, dizse (añu 1800 aproximadamente):

“El lugar de Bárzana, llamado antiguamente Pola de Bárzana, se halla a la orilla y lado oriental del río, y es la capital del Concejo, que tiene en él una torre alta a manera de Castillo que sirve de Cárcel y pegando a él una decente sala donde se hacen las elecciones de Oficios de Justicia y celebra sus Juntas el Ayuntamiento (…)”.Per otra parte nel Diccionario de Pascual Madoz, contra’l 1850, dizse que’l Conceyu axuntaba nun “antiguo y bien conservado castillo”.

Esta obra desapaeció a la de facer la caxa de la carretera a mediaos del sieglu XIX (al poco, por tanto, de lo qu’escribe Madoz) y probablemente taba nel centru de la villa, a la altura más menos de la pequeña plazuela onde ta la fuente pública. Foi sustituida pola actual Casa del Conceyu, que nun conserva recuerdu dalu de l’antecesora nin elementos arquitectónicos d’interés.

El Conceyu tenía representación propia na Xunta Xeneral del Principáu d’Asturies, organismu rexidor del país hasta primeros del sieglu XIX, integrada por procuradores de los diferentes conceyos agrupaos en partíos, ún d’ellos nomáu “de la obispalía”, al tar formáu polos territorios remíos del dominiu episcopal (Proaza, Teberga, Quirós, Santu Adrianu, ente más otros).

SIEGLOS XVIII Y XIX

Nun hai mayores acontecimientos na zona, sacante los propios del ritmu de les estaciones y los trabayos del campu, y la visita de dalgún personaxe como Xovellanos nel 1792 camín de Castiella, hasta la Guerra de la Independencia, cuando los invasores franceses pasen per Chanuces causando grandes estropicios e incendiando la vieya casa solar de los Miranda, no alto del llugar (los restos vense tovía agora).

Nel 1821 naz nel llugar de Cortes Melchor García Sampedro, misioneru dominicu martirizáu en Tonkín, provincia d’Indochina (hoi El Vietnam), que va ser beatificáu (1958) y posteriormente canonizáu (1988).

Les Guerres Carlistes dexaron tamién rastru en conceyu, anque yá nun hai recuerdu d’ello. Na primera (1833-1839) les tropes de Sánz, Gómez y Flórez atravesaron el conceyu, y na tercera (1872-1876) munchos mozos quirosanos xuntáronse a los carlistes.

BREVE INDUSTRIALIZACIÓN

Nel sieglu XIX y parte del XX produzse una tímida industrialización, con esplotaciones de fierro y carbón, que remata na década de 1960, a partir de la que se produz el despoblamientu masivu del conceyu.

En rellación con esti desenvolvimientu industrial proyectóse un ferrocarril pa unir Llión y Asturies per L’Altu Ventana y Quirós, llegando hasta San Esteban, en Muros, pero la idea fracasó en favor del trazáu de Payares.

SIEGLU XX

La Guerra Civil nun traxo batalles decisives a estos valles, pero sí diferentes desgracies en forma de muertes nos frentes y na retaguardia, persecuciones por motivos políticos, fame, mieu y miseria.

Esistió una llinia de fortificaciones de los milicianos en L’Altu Ventana y Agüeria, con trincheres y obres defensivas que son visibles aína.

Nel 1958 Vicente José González García señalaba les siguientes empreses actives en Quirós:

• FÁBRICA MIERES: Cinfuegos, Nimbra, La Fábrica (Carbón y fierro).
• FUENTES Y COMPAÑÍA: Nimbra (Carbón).
• MINAS DE XAGARÍN: San Salvador, Salceo (Carbón).
• SOCIEDAD HULLERA ESPAÑOLA: Chanuces (Carbón)
• MINAS DE CORTES: Cortes (Carbón).

Toes elles desapaecieron en menos de trenta años, anque dalguna mina sobrevivió hasta los años ochenta integrada na compañía estatal HUNOSA.

Actualmente la economía del conceyu ta sustentada na ganadería, el turismu y los transformaos agroalimentarios, principalmente.